Alberte Parnuuna: Åndehul
2026-mi sisamanngornermit apriilip 16-ianit sapaat maajip 17-iata tungaanut saqqummersitsivimmi inimi Tusarnaartarfimmi Alberte Parnuunap (i. 1995) videoliaralugu nipilerlugulu eqqumiitsuliaa ”Åndehul” (allu) misigineqarsinnaassaaq.
Alberte Parnuuna Nuummiinngaanneersuuvoq, maannalu Københavnimi najugaqarluni eqqumiitsuliortutut 2D-nillu titartakkanik aalasunik suliaqartarpoq. Titartakkanik suliffeqarfiutini ”siorssuk visuals” 2024-mi pilersissimavaa. Oqaluttuarneq imminerminut tunngasut, politikkimut tunngasut, aammalu killisimanarpalaartumik oqaluttuarneq Albertep eqqumiitsuliornermini suleriaaserai. Kulturikkut aalajangersimaneqartut, eqqaamasat, kinaassuseq, nunasiaataasimanerullu kinguneri sammikkajuttarpai.
Alberte Parnuuna Københavns Universitetimit Bachelor of Arts of Film and Media Science (2018) aamma Master of Fine Arts of Visual Culture (2022) ilinniarsimasuuvoq. Europami Kalaallit Nunaannilu sumiiffinni assigiinngitsuni ataatsimoorluni saqqummersitsinerni, filminik suliaqarfinni oqallinnernilu peqataasarsimavoq.
Tallimanngornermi apriilip 17-iani nal. 15-17 Alberte Parnuuna naapissinnaavat. Iserneq akeqassanngilaq, tamulugassaqassaarlu!
Eqqumiitsuliaq pillugu:
Taama isikkoqarsinnaagaluartoq, qaqqaq uninnganeq ajorpoq. Suna tamarmi aalajuarpoq, uninngasutut allanngujuitsutullu isigisagut allaat.
Tamanna tunngavigalugu allanngorneq, piffissaq isiginneriaatsillu isiginnaagassiatigut nipitigullu eqqumiitsuliortup misissugaraa. Piunikuusimasut sulilu piulertussat nalusagut eqqumiitsuliami misissorneqarput. Qanga, maanna siunissarlu ataatsikkut tamarmik piupput. Soorlu qanganitsat nutaallu, uninngasut aalasullu. Piusut piuminaatsut isiginneriaatsillu nikingasut eqqumiitsuliami “Åndehul” (allu) sammineqarput, apeqqutigineqarlunilu: Takusakka takuigit?
Piffissami uivernartumi, aarleritsaqqanermi paasissutissanillu imaaginnavinnermik naammatsisimaarnerup nalaani matumani eqqumiitsuliortup isiginnaartut anersaarfissaannik neqerooruteqarpoq, uninngavissamik, isiginnaarnissamik maluginninnissamillu neqeroorluni.
Sivisussusaa: 10 min.