Pia Arke: Ittoqqortoormiit

Sisamanngornermi septembarip sisamaani 2025 Ittoqqortoormiit tunngavilerneqarneranit ukiut 100-nngussapput. Pisoq malunnartissallugu ulloq taanna saqqummersitsineq ”Pia Arke: Ittoqqortoormiit” ammasavarput.

Ilaquttami Ittoqqortoormiininngaanneernerat tunngavigalugu Kalaallit Nunaata oqaluttuarisaanera namminerlu inuttut oqaluttuassani Pia Arkep misissorsimavaa. Ittoqqortoormiit eqqumiitsuliortutut misissornera atuaganngorlugu 2003-mi ”Ittoqqortoormiinit Oqaluttuat” saqqummersissimavaa. Taanna Pia Arkellu suliarisimasai Ittoqqortoormiinut attuumassutillit allat, soorlu ”Jord til Scoresbysund” sanaqqinneqarlugu, saqqummersitsinermi ilaatigut takuneqarsinnaassapput.

Saqqummersitsineq sisamanngornermi septembarip sisamaani nal. 13 ammassaaq. Kaffeqassaaq kaageeraqarlunilu. Piumasut tamarmik tikilluaqusaapput, isernerlu akeqassanngilaq.

Nal. 13:30-14:00 aamma nal. 16:30-17:00 soqutiginnittunut tamanut saqqummersitsineq pillugu saqqumiisoqartassaaq.

Saqqummersitsineq Kommuneqarfik Sermersuup aningaasaateqarfiata Sermip aningaasaliiffigaa.