Laakkuluk Williamson: Nuliaminik Neqilik // The Flesh of Wives
Sisamanngornermi oktobarip 22-ani nal. 17 eqqumiitsuliortup Inuk-Canadarmiup Laakkuluk Williamsonip saqqummersitsinera ”Nuliaminik Neqilik // The Flesh of Wives” Nuummi Eqqumiitsulianik Saqqummersitsivimmi ammaanersiorneqassaaq.
Saqqummersitsineq Laakkuluk Williamsonip eqqumiitsuliortutut kisimiilluni siullermeerutingaa. Saqqummersitsineq Taqralik Partridgemit aaqqissuussaavoq. Videoliat, nipi, assilisat angisuut, sapannganik suliat, ilusilersukkat aammalu pinngortitamit tigusat saqqummersitsinermi ilaapput. Saqqummersitsinermi eqqumiitsuliami qitiusumi Laakkuluk Williamsonip Igimarasussussuaq, nuliaminik nerisartoq, pillugu kalaallit oqaluttuatoqaataat sammivaa, nuliaasup qimaasimasup isaanit isiginnittuullluni. Eqqumiitsuliortoq nammineq oqaluttuami nuliaasutut inississimalluni misigisat sakkortuut naapinneranni eqqarsallaqqinneq akiuussinnaassuserlu oqaluttuarai.
Oqaluttuami sammineqartut saqqummersitsinermi eqqumiitsulianut allanut ingerlaqqipput, sammisanillu allanik, soorlu ilaquttanut qanilaassuseq, ilitsoqqussat, pilineq, nerisassallu pillugit namminersorsinnaaneq ilanngunneqarlutik. Nunasiaataasimanerup kingunerani aaqqissuussaanermi naapertuilluanngitsut ilaatigut patriarkatet (inuiaqatigiinni angutit pingaarnertut inissisisimasutut isigineqarnerat), kapitalisme (aningaasateqarnerit inuiaqatigiinnik aqutsisuunerunerat), naqisimanninneq, inunnik naleqanngitsutut isiginnittarneq aammalu ammit qalipaataat peqqutigalugit arnanik immikkoortitsisarneq initussuseq timinillu isiginnittariaatsit atorlugit eqqumiitsuliortup akiorniarpai.
Saqqummersitsineq 2026-mi upernaakkut Londonimi Mimosa Housemi takutinneqarpoq, Nuummilu takutinneqareerpat Canadami Ottawamut ingerlaqqissalluni.
Saqqummersitsineq 2027-mi januaarip 31-ata tungaanut misigineqarsinnaassaaq. Saqqummersitsineq Eqqumiitsuliornermik Aningaasaateqarfimmit taperneqarpoq. Oktobarip 22-ani nal. 17 ammaanersiornermut atatillugu Laakkuluk Williamson eqqumiitsuliorluni isiginnaartitsissaaq (performance).
Eqqumiitsuliortoq pillugu:
Laakkuluk Williamson eqqumiitsuliortuuvoq canadarmioq-kalaaleq Inuk. Nunvaummi Iqalunni najugarpoq. Taalliortuullunilu eqqumiitsuliorluni isiginnaartitsisartuuvoq (performance). Sammisat assigiinngitsut tunngavigalugit suliaqartarpoq, soorlu nunat inoqqaavisa akornanni kulturi pillugu politikki, nunasiaataajunnaarniarneq, inuiaqatigiinni allannguinissamik suliniuteqarneq, silaannaap allanngoriartornera, aammalu oqaatsit uummarissaaneq. Williamson kalaallisut tuluttullu sulisarpoq, uaajeerneq, taalliorneq, isiginnaartitsineq, filmiliorneq, nipilersorneq aamma isiginnaartitsilluni eqqumiitsuliorneq (performance) periuseralugit nunasiaateqartarneq, kinguaassiuutit atorneri, kinguaariinni nukittussuseq, annilaanganeq, killigititat aamma asanninneq sammisarpai. Williamson Canadami eqqumiitsuliortutut nersornaatinik arlalinnik akissarsitinneqartarsimavoq, ilaatigut 2021-mi Sobey Art Award. Williamsonip eqqumiitsuliortut allat suleqatigikkajuttarpai. Kingullermik Nuuk International Film Festival septembarimi 2026-mi producerit allat suleqatigalugit videoliani ”Tartupaluk” takutippaa.
Saqqummersitsinermik aaqqissuisoq pillugu:
Taqralik Partridge skotsk-candisk/Inuuvoq, saqqummersitsinernik aaqqissuisartoq, eqqumiitsuliortoq atuakkiortorlu. Nunavimmi Kuujjuarminngaanneersuuvoq. Avataq Cultural Centre-mi ukiuni arlalinni attaveqatigiinnermik eqqumiitsuliallu pillugit allaffissornermi sulisuusimavoq. Patridge Ottawami SAW Gallery-mi Nordci Lab-iani aqutsisuusimavoq, aammalu Art Gallery of Ontariomi, Art Gallery of Guelphimi, katersugaasivinnilu assigiinngitsuni aaqqissuisutut sulisarsimalluni. Canadami eqqumiitsuliorneq pillugu atuagassiami Inuit Art Quarterlymi aaqqissuisuusimavortaaq. Canadami nunanilu tamalaani eqqumiitsuliorluni isiginnaartitsineq (performance) sammillugu festivalini ukiut 20-t sinnerlugit suliaqartarsimavoq, Inuttut torlorsortartutut aammalu taalliorluni isiginnaartitsisartutut. Assilianngorlugit filminngorlugillu suliarisarsimasai Amerika Avannarlermi, Norgemi, New Zealandimi, Tuluit Nunaannilu saqqummersitsinerni takutinneqarsimapput. Taqralik Partridge ilaquttanilu Canadamiittumi Ottawami najugaqarpoq.