nuna-

Saqqummersitsinerup qulequtaraa ”nuna-”. Kalaallit Nunaata nunataa, pinngortitaq, qalipanneqartaqaaq, eqqumiitsuliarineqarluni, assilisaarneqartarlunilu. Kalaallit Nunaata pinnissusaa, pisuussusaa, toqqisinassusaa, assilianngorlugu takutikkusunneqartaqaaq, misigineqarusunneqartaqalunilu. Tamaani najugallit nalunngilaat nammineq misigalugu qanoq tunniussassaqartartiginera.

Oqaaserli nuna ilaatigut aamma nassuiaatinut pisunullu assigiinngitsorpassuarnut tunngassuteqarsinnaavoq. Saqqummersitsinermi oqaatsinik nunamik aallartittunik, imaluunniit nunamut allatigut tunngasut illit nammineq allariarlugit nivinngaavimmut nivinngarsinnaavatit. Oqaatsit soorlu nunaga, nunaqarfik, nunalerineq, aammalu oqaatsit qallunaatut tuluttut, immaqalu aasaanerani nunanit allanit tikeraartut oqaasii atorlugit.

Taakku oqaatsit ilagaat nunasiaataaneq. Allaat inuit nunanit allaninngaanniit Kalaallit Nunaannut tikillutik namminneq atsersuisarsimapput. Nuna ilisimatusarfigalugu, paasiniaavigalugu, nalunaarsorlugu. Nalunaarsorneqarneratigut piginnittussaatitaaneq ersersarniarlugu. Ukiuni kingullernittaaq Kalaallit Nunaat silarsuarmit soutigineqangaatsiarpoq. Aalassannartarpoq, aarleritsaqqanerlu nunaqqatigiit akornanni atuuttarluni. Ilaatigut Erfalasorput atorlugu akerliuneq takutinneqartarpoq, akerliunerlu eqqumiitsuliortut aamma ersersinniartarsimavaat. Siusinnerusukkut aamma Kalaallit Nunaata nunataanik atsersuisimasut ilaatigut eqqumiitsuliortut uparuartarsimavaat, soorlu Anne-Birthe Hovep (1951-2012) naqitigaa “De rejste og rejste” 1979-imeersoq. Aqqaluk Lyngep (in. 1947) qallunaatut taalliaa taama qulequtalik isumassarsiorfigisimavaa. Lyngep taalliaa 1997-imi atuakkatut saqqummersitaani “Isuma / Synspunkt” atuarneqarsinnaavoq.

Saqqummersitsinermi katersugaasiviup katersaataanit qalipakkat, naqitikkat qiperukkallu nunamut attuumassutillit takussaapput. Taakku saniatigut assiliisartut marluk nunamiittarnerminni assilisimasaat aamma takussaallutik.

Saqqummersitsineq septembarip arferngata tungaanut takusarneqarsinnaassaaq.