Qanga Maannalu Nuummi Eqqumiitsulianik Saqqummersitsivimmi nivingavoq. Robert Holmenep suliaa 2008-meersuuvoq, arlalinngorlugulu suliarinikuuvaa. Ataaseq Ilulissani saqqummerseqqavoq.

Qanga Maannalumi takutinniarneqarpoq, qilaatersortoq qaqortumik tarralik tunuliaqutaalu qernertuulluni. Sakiaa niaqualu kisimik ersipput. Eqqumiitsuliaq qanillillugu takugaanni qalipaaffissiamut maniilakuluttumut qalipataanera malunnarpoq, qarasaasiamullu atortut assigiinngitsut puttussimasutullusooq illutik.

Robert Holmene ukiuni arlalinni Air Greenlandimi sulivoq. Qarasaasiamullu atortorissaarutit assigiinngitsut igitassat tassanngaaniik pissarsiarisimavai. Qulimiguulllip S-61-ip sling-gearianut puujusimasup qaavanut qarasaasiamut atortorissaarutit ikkussuussimavai.

Holmenip nammineq oqaluttuaraa, suliani 1994-imiilli isumassarsiaralugu. Aallaqqaammut siunertarigaluarpaa, Emanuel A. Petersenip assinga qalipanniarlugu qarasaasiap atortui saattukujuut katiterlugit tunuliaqutsiullugit.
Taarsiulluguli atortut ikkussuuteriarmata, soorlu tassa tassunga sanaat. Qilaatersortumik assitaliussaq Holmenip arktiskebilleder.dk-miit, pissarsiaraa, taannalu qilaatersortoq tassaavoq Maratse Tunumiu.

Qilaatersortup assinga qaqortumik tarrartalik, tunuliaquttamiit qernertumit puttuttutut isikkoqarsinnaagaluartoq, Holmenip killormoortillugit qalipappai. Pladeq qarasaasiap atortutalik qaqortumik qalipaqqaarpaa, kingornagullu qernertumik qalipallugu.

Qanga Maannalumi kalaallit eqqumiitsuliariugaat takuneqarsinnaavoq – tassalu qilaatersortoq. Nuummi Eqqumiitsulianik Saqqummersitsivimmi eqqumiitsuliat qilaatersortut assigiinngitsunik iluseqarput. Tamannalu Holmenip Qanga Maannalumi takuteqqippaa, asserlu ilisarnartoq qarasaasiap atortuinik tunuliaqutserneratigut nutaaliorluni. Silarsuup nutaaliaasup silarsuaq ileqqutoqalik naapippaalusooq.

Eqqumiitsuliaq aqqutigalugu immaqa aperisoqarusuppoq: Qilaatersortoq aamma ileqqutoqqat nalitsinnut nutaaliaasumut qanoq attuumassuteqaramik? Imaluuniit atuaqatigiit ilaasa oqarnerattut, qarasaasiaqarnerup, teknologip illoqarfissuaqarnerullu nalaani nutaaliaasumi inuugaluarluta, ileqqutoqqanut suli atassuteqarpugut, ileqqutoqqallu suli ilutsinniillutik.

Robert Holmenip tupilaliai pingasut aamma Nuummi Eqqumiitsulianik Saqqummersitsivimmi saqqummersinneqarput. Tupilannik qiperuisarneq Holmenip eqqumiitsuliornermik suliaqartalernerminut aallarniutigaa, ilaatigut Svend Jungemit kaammattorneqarluni. Holmene piffissap ilaani katersugaasiviup sanaluttarfiani maannalu Iluliaaqqami tupilannik qiperuisarpoq.
Robert Holmenip saqqummersittagai Buaarsikkut saqqummersitsinermi Nunatsinni quijassuarneq 2016 imi januaarip 23-at tikillugu aamma takuneqarsinnaapput.

Allaaserinnittoq: Stine Lundberg Hansen. 2016.