Frodo Mikkelsen (in. 1974)

Frodo Mikkelsen (in. 1974) eqqumiitsuliornermik imminut ilinniartissimavoq. Mikkelseni Københavnimi najugaqarlunilu suliffeqarpoq. Quliinnarnilli ukioqarluni graffiti sammisarilerpaa, ullumilu qalipagaani tamanna takuneqarsinnaavoq, soorlu ilaatigut ilusilersukkat takujuminartut sakkortuunik qalipaasersukkat suliarisarlugit. Nuummi Eqqumiitsulianik Saqqummersitsivimmiipput Mikkelsenip suliai pingasut paasiuminaatsunik qulequtsikkat:Madhuller…, – Sort isbjørn i isgrotte… aamma Når isen er væk, er der serveret…, tamarmillu 2013-imeersuupput.

Qalipagaani ilusilersugai ilisarnarluarput ersarissumillu immikkoortikkuminarlutik; assersuutigalugu allarsuaq, arfeq, orpik, aamma nuna aputilik takusinnaavagut. Immikkoortulli tamarmik suuneri imaaliallaannaq takuneqarsinnaaneq ajorput; ersarissunik titarnernik takusassaqaraluartoq immikkoortoqarpoq qangatasunik, karsinik qalipaatigissunik paasiuminaatsunik. Immikkoortut tamakku assut maluginiarnarput, suuneri imaaliallaannaq takusinnaannginneri pissutaalluni.

Mikkelsenip suliaqarnermini ilisarnaataa tassaagajuppoq, eqqumiitsuliap qeqqani uumasoq. Uumasut taakkuupput Mikkelsenip ’tag’-inik nammineq taasai. Tag tassaavoq graffitiliornerup silarsuaani ilisarnaatitut ittoq, matumanilu Mikkelsenip suliamini ‘tag’ ilanngullugu atugarisarpaa. Ilusilersueriaasia suliamiit suliamut takussaajuarpoq, taakkunanilu qalipagaasa iluini immikkoortut timitaqanngitsut aamma takussaasarlutik. Taamaalilluta eqqumiitsuliortup aaliangersimasup ataatsip suliarisimagai takusinnaalersarparput – taamaannerisigut suliaqartup “atsiornerisut”, tassa ilisarnaatigisaatut, atorneqarlutik.

Eqqumiitsuliattegneseriat silarsuaannut attuumassuteqarpasissinnaapput. Soorlulusooq tegneseriani assini tulleriissaattut ilaanni asseq ataasiusoq, uagullu tegneseriap sinnera immertussaallugu. Mikkelsenip qulequtsiussani naliginnaasumik toornernik pingasunik naggasertarpai, taamaalillunilu takunnittup nangitassarisaatut misinnarsilluni. Assersuutigalugu Når isen er væk, er der serveret…. Uani takusinnaavarput arfeq, qaarsup qaani pikippasittoq. Tunuatungaani nunataqarpoq, arfermit portunerusumik. Immaqa arfeq naqqanut tunngalluni nikinnaveerpoq – taamaassappat taava naak imaq? Arfeq aappillarissumik ikumasumik qallerneqarsimavoq – immaqa taanna pissutaalluni qulequtaa naapertorlugu sassaalliutaaniartoq? Nunataa inoqanngimmat kina sassaallerfigineqarnersoq eqqarsaatersuutissartaqarsinnaavoq.

Mikkelsenip suliaani allani marluusuni inoqanngitsoq aamma takusinnaavarput, taakkunanili uumasoq takusinnaallutigu; nanoq. Nanoq suliani uumasutut pissaaneqaqisutut suliaavoq; qalipakkami – Sort isbjørn, i isgrotte… nanoq nunataanut saaqqavoq, uanili Madhuller… nanoq piniarluni. Mikkelsenimit nanoq sikup kunngiatut suliarineqarsimavoq. Mikkelsen nuannarinnittuaraluarluni Kalaallit Nunaanniissimanngisaannarpoq. Kalaallit Nunaalli ataasiaannarani timmisartumut ilaalluni qulaattareerpaa, timmisartortarnerminilu illunik takunngisaannarpoq, taamaallaat qaqqat sikulu takusinnaasarpai: ”Takorloortuaannarpara inuilaarsuusoq kusanartoq uumasullu nunagigaat”. Mikkelsenip Kalaallit Nunaat pillugu tusakkani ungasissumiillu takusimasani naapertorlugit eqqumiitsuliortarpoq; Kalaallit Nunaat inuilaarsuusoq,  uumasut eqqissillutik naalagaaffigisaat.